محکمہ ماحولیات چکوال کی دبنگ کارروائی، وادی جھنگڑ ڈیرہ راجگان میں غیر قانونی اسٹون کریشر سیل

چکوال (نمائندہ اردو ٹرن) محکمہ ماحولیات چکوال کی جانب سے وادی جھنگڑ کے علاقے ڈیرہ راجگان میں موثر اور دبنگ کارروائی کرتے ہوئے غیر قانونی طور پر چلنے والے اسٹون کریشر کو سیل کر دیا گیا۔ یہ کاروائی ڈسٹرکٹ انوائرنمنٹ آفیسر چکوال میڈم عنزہ نیازی کی زیر نگرانی انسپکٹر ارباب نیازی اور ان کی ٹیم نے انجام دی۔ موقع پر محکمہ ماحولیات کی ٹیم نے ضابطے کے مطابق کارروائی کرتے ہوئے اسٹون کریشر کی مشینری بند کروا کر علاقہ مکینوں کو ماحول دوست اقدامات کی یقین دہانی کروائی۔ اہلِ علاقہ نے اس موقع پر محکمہ ماحولیات کی بروقت کارروائی کو سراہتے ہوئے کہا کہ اس اقدام سے ماحولیاتی آلودگی میں واضح کمی آئے گی اور شہریوں کو سکھ کا سانس ملے گا۔ علاقہ کے نمائندہ سفیر پاکستان مہر ظفر علی فریدی ہرل کی طرف سے اس معاملے میں بھرپور دلچسپی اور کاوشوں پر اہلِ علاقہ نے انہیں خراجِ تحسین پیش کیا اور امید ظاہر کی کہ اسی طرح کے اقدامات مستقبل میں بھی جاری رہیں گے تاکہ چکوال کو صاف اور صحت مند ماحول فراہم کیا جا سکے۔