چکوال (راجہ تنویر حیدر)
حکومتِ پنجاب کے اسموگ فری پنجاب پروگرام، لاہور ہائی کورٹ کے احکامات، ڈائریکٹر جنرل تحفظِ ماحولیات پنجاب اور ڈپٹی کمشنر چکوال میڈم سارہ حیات کی ہدایات پر عمل درآمد کرتے ہوئے ای پی اے چکوال کی ٹیم نے تلہ گنگ اور لاوہ کے علاقوں میں ماحولیاتی قوانین کی خلاف ورزی کرنے والے بھٹوں کے خلاف بھرپور کارروائی کی۔
اسسٹنٹ ڈائریکٹر ماحولیات محترمہ عنزہ نیازی کی نگرانی میں ہونے والی کارروائی کے دوران آٹھ نان زگ زیگ بھٹے موقع پر مسمار کر دیے گئے۔ محکمہ ماحولیات کے مطابق صرف زگ زیگ ٹیکنالوجی سے مزین بھٹوں کو کام کرنے کی اجازت ہوگی کیونکہ یہ ٹیکنالوجی فضائی آلودگی اور کاربن کے اخراج میں واضح کمی لاتی ہے۔
ترجمان ای پی اے نے کہا کہ بھٹہ مالکان کو بارہا تنبیہ کی گئی ہے کہ وہ اسموگ سیزن 2025 کے دوران قوانین پر سختی سے عملدرآمد یقینی بنائیں، بصورت دیگر ان کے خلاف مزید قانونی کارروائی عمل میں لائی جائے گی۔
اسسٹنٹ ڈائریکٹر ماحولیات چکوال میڈم عنزہ نیازی نے واضح کیا کہ یہ کریک ڈاؤن عوامی صحت، صاف فضا اور ماحولیاتی تحفظ کے لیے جاری ہے تاکہ چکوال کو اسموگ فری ضلع بنانے کے وژن کو حقیقت میں بدلا جا سکے۔
